Këshilltari i PD në Bashkinë e Tiranës, Ilir Alimehmeti, ka deklaruar në A2 CNN se pas 36 ditëve protestë para Kryeministrisë, zgjidhja e vetme për situatën politike në vend do të ishin zgjedhjet e parakohshme.
Ai u shpreh se mënyra më e drejtë për të testuar mesazhin e protestës është përmes votës, duke theksuar se debatet mbi sloganet nuk duhet të jenë në qendër të analizës politike. Alimehmeti nënvizoi gjithashtu se kërkesa që, sipas tij, bashkon rrymat e ndryshme brenda protestës është dorëheqja e kryeministrit Edi Rama, duke e cilësuar këtë si emëruesin e përbashkët të pjesëmarrësve.
Alimehmeti është mjaft i qartë kur vjen puna te artikulimi i kërkesave të protestuesve ndaj kryeministrit Edi Rama, duke e vendosur theksin te dorëheqja e tij dhe zgjedhjet e parakohshme si zgjidhje. Por kjo qartësi duket se zbehet sapo debati kalon në territorin më të ndjeshëm brenda vetë opozitës, ku ai nuk shprehet për një tjetër kërkesë të artikuluar nga protestuesit, largimin e Sali Berishës nga skena politike.
Në këtë pikë, mungesa e një qëndrimi nuk kalon pa u vënë re, sidomos në një protestë ku thirrjet nuk janë të drejtuara vetëm kundër qeverisë, por edhe ndaj figurave kyçe të opozitës. Duket sikur emrat e “problemit” edhe për Alimehmetin përcaktohen më lehtë kur janë në anën tjetër të barrikadës, ndërsa brenda kampit opozitar tregohet më i kujdesshëm duke i mbyllur sytë dhe veshët dhe nuk e përmend si problem.
