Prokuroria e Posaçme ka përfunduar hetimet dhe ka marrë të pandehur 28 pedagogë apo punonjës të Universitetit Bujqësor të Tiranës. Në mesin e të akuzuarve janë edhe biznesmenë. Ndaj tyre rëndojnë akuzat për shkelje të barazisë në tendera dhe shpërdorim detyre.
Në mesin e të pandehurve është Edmond Tërthorja, administratori i UBT-së, dy zv.rektorët Ilir Kapaj dhe Romina Koto, përgjegjësi i Departamentit të Moduleve Paraklinike, Bejo Bizhga, si dhe 20 akademikë dhe punonjës të tjerë. Bëhet fjalë për abuzime me nëntë tendera të zhvilluar në vitin 2022 me vlerë totale prej 90 milionë lekësh.
Ndër të tjera, hetimi ka provuar se të dhënat e përgatitjes së fondit limit, specifikimet teknike, termat e referencës dhe hartimi i dokumenteve standarde të tenderit janë kryer nga zyrtarët përgjegjës të universitetit, në bashkëpunim me operatorët ekonomikë fitues “Krijon” sh.p.k, “Zero Group” sh.p.k dhe “Malvina Visoka PF”.
SPAK ndërkohë ka veçuar një dosje të re dhe po vijon hetimet për tendera të tjerë.
