Një ngjarje e rëndë është regjistruar në fshatin Theth, ku një konflikt mes disa shtetasve ka rrezikuar të përshkallëzohet në dhunë më të madhe. Policia e Shkodrës ka arrestuar shtetasin Alfred Rrupa, 33 vjeç, banues në Theth, i dyshuar si autor i të shtënave me armë zjarri ndaj një automjeti me të cilin po udhëtonin tre persona.
Sipas hetimeve paraprake, për motive të dobëta, Rrupa ka qëlluar me pistoletë në drejtim të mjetit të drejtuar nga shtetasi N. H., ku ndodheshin edhe P. H. dhe D. Rr. Fatmirësisht, nga të shtënat janë shkaktuar vetëm dëme materiale. Më pas, tre shtetasit kanë ushtruar dhunë fizike ndaj 33-vjeçarit.
Policia ka ndërhyrë menjëherë, duke parandaluar përshkallëzimin e mëtejshëm të konfliktit. Arma e përdorur në ngjarje, një pistoletë me municion luftarak, është sekuestruar në cilësinë e provës materiale.
Ndaj tre shtetasve të tjerë është nisur procedim penal në gjendje të lirë, ndërsa materialet hetimore i janë referuar Prokurorisë së Shkodrës për veprime të mëtejshme.
