Numri i aksidenteve rrugore me pasoja fatale ka ardhur në rritje gjatë muajve të fundit, duke shtuar shqetësimin për sigurinë në rrugët e vendit. Veçanërisht alarmues konsiderohet fakti që një pjesë e madhe e viktimave janë këmbësorë, përfshirë edhe fëmijë.
Të dhënat e muajve prill dhe maj tregojnë se të paktën 11 këmbësorë kanë humbur jetën si pasojë e aksidenteve rrugore. Shumë prej rasteve kanë ndodhur në zona të populluara apo pranë shkollave, duke nxjerrë në pah problemet me respektimin e rregullave të qarkullimit dhe mungesën e sigurisë për qytetarët që lëvizin në rrugë.
Kjo ka sjell një situatë tepër shqetësuese, duke shtuar ndjeshëm numri i aksidenteve ku viktima janë qytetarë që ecin në trotuare apo kalojnë rrugën, dhe jo drejtues automjetesh.
Mes viktimave të këtyre muajve ka pasur edhe të mitur. Dy fëmijë humbën jetën në Durrës pasi u përplasën në trotuar nga një automjet që drejtohej nga një shofer në gjendje të dehur. Ndërkohë, ngjarja më e fundit tragjike u regjistrua në Elbasan, ku një 7-vjeçar humbi jetën pranë shkollës së fshatit Mengël pasi u godit nga automjeti i drejtuar nga regjisori Petri Bozo.
