Një ngjarje e rëndë është shënuar pasditen e sotme në qytetin e Vlorës, pasi është vrarë recepsionisti i një hoteli në zonën e Dhërmisë.
Nga kamerat e sigurisë rezulton se e autori i dyshuar Gerald Shehu, ka qëlluar recepsionistin Eraldo Nevruzi me armë dhe më pas ka fshehur trupin. Ndërkohë dyshohet se autori pas ngjarjes është larguar drejt Greqisë.
Dëshmitarët kanë konfirmuar se kanë dëgjuar krismat, si dhe ka gjurmë gjaku të viktimës.
Njoftimi i policisë:
Himarë/Informacion shtesë
Në vijim të veprimeve intensive që po kryen grupi hetimor, në drejtimin e Prokurorisë, për gjetjen e shtetasit E. N., si dhe për zbardhjen e rrethanave dhe dokumentimin e plotë ligjor të rastit, sqarojmë se nga kontrollet e deritanishme nuk është bërë ende e mundur gjetja e shtetasit E. N.
Policia e Shtetit ka shpallur në kërkim autorin e dyshuar, shtetasin G. Sh. (bashkëpronar i hotelit ku punonte shtetasi E. N.) dhe po bashkëpunon me Policinë greke për të bërë të mundur lokalizimin dhe kapjen e tij, pasi nga hetimet e deritanishme, pamjet filmike të sekuestruara dhe dëshmitë e marra, dyshohet se shtetasi G. Sh. ka qëlluar me armë zjarri ndaj shtetasit E. N.
Policia e Shtetit vë në dispozicion foton e autorit të dyshuar, e cila i është vënë në dispozicion edhe Policisë greke dhe partnerëve të vendeve të rajonit.
