Kanë dalë detaje të reja lidhur me vrasjen e 67-vjeçarit, Dod Mamli në Kurbin, i cili u vra mbrëmjen e sotme me armë zjarri në rrugën e fshatit Vilëz, Zhejë, Kurbin.
Mësohet se dy djemtë e viktimës janë të akuzuar për masakrën e 2015 në Mamurras. Pista kryesore që po heton policia është ajo e hasmërisë.
Djali i 67-vjeçarit që u vra sot, ka vrarë një person në vitin 2015 në qendër të Mamurrasit dhe ka plagosur 3 te tjerë.
Bëhet fjalë për Enrik Mamli, i cili ka vrarë Naim Tafën. Ata kanë pasur një konflikt të mbartur nga Italia për 250 mijë euro që i detyrohej viktima autorit.
Ngjarja ndodhi në qendër të Mamurrasit, më 23 shtator të vitit 2015, ku mbeti i vrarë Naim Tafa dhe u plagosën rastësisht shtetasit Idriz Tafa dhe Altin Çoku, të cilët gjendeshin, bashkë me shumë persona të tjerë, në zonën e stacionit të trenit.
Njoftimi i policisë:
Në rrugën e fshatit Vilëz, Zhejë, Kurbin, shtetasi D. M, 67 vjeç është vrarë me armë zjarri nga persona ende të paidentifikuar.
Grupi hetimor ndodhet në vendngjarje dhe po punon për sqarimin e rrethanave dhe identifikimin e autorëve.
Ndërkohë shërbimet e Policisë po vijojnë kontrollet dhe në ndihmë të Policisë Vendore kanë shkuar katër grupe të Forcës Kombëtare të Sigurisë, Njësia Shkodër.
