Një 3-vjeçar ka ndërruar jetë në Shkodër, ndërsa motra e tij 7-vjeçare ndodhet në gjendje kritike për jetën dhe është e shtruar prej dy ditësh në QSUT. Dyshohet se shkaku i gjendjes së tyre shëndetësore është helmimi nga ilaçi kundër minjve.
Burime pranë Spitalit Rajonal të Shkodrës bëjnë me dije se fëmija 3-vjeçar është paraqitur në spital të shtunën rreth orës 10:00 të paradites, në gjendje të rënduar shëndetësore, me insuficiencë kardiake (puls të ulët, shenja jetësore shumë të dobëta). Vetëm 10 minuta pasi ka mbërritur në spital, ai ka ndërruar jetë.
Rreth 20-30 minuta më vonë, në të njëjtin spital është paraqitur edhe motra e tij me simptoma të ngjashme. Ajo ka marrë ndihmën e parë dhe është transportuar menjëherë në QSUT, ku vijon të jetë në gjendje kritike për jetën.
Të dhënat e deritanishme janë vetëm konstatime paraprake nga Spitali Rajonal i Shkodrës dhe QSUT. Një mjeke specialiste e kontaktuar nga VNA thekson se, për të përcaktuar shkakun e saktë të helmimit, është e domosdoshme të analizohen simptomat klinike të intoksikimit, si:
• Shenja gastroenterike
• Simptoma neurologjike
• Reagime të lëkurës
• Probleme kardiovaskulare
• Insuficiencë hepatike ose renale
• Delirium
Gjithashtu, mbeten pa përgjigje një sërë pyetjesh të rëndësishme:
• Me çfarë lloj substancash kanë rënë në kontakt pacientët? (Medikamente, substanca kimike toksike, ujë i kontaminuar, kërpudha?)
• Çfarë ekzaminimesh laboratorike janë kryer për të arritur në një diagnozë të saktë?
• Cila ka qenë procedura e trajtimit? (Lavazh gastrik, hemodializë, terapi intensive për mbajtjen e funksioneve jetësore?)
• A është përdorur ndonjë antidot specifik?
• Sa intensivisht dhe në çfarë kohe ka filluar trajtimi mjekësor intensiv?
Deri më tani, asnjë mjek në spitalet përkatëse nuk ka dhënë një përgjigje të plotë për këto çështje, duke lënë vend vetëm për hipoteza mbi shkakun e helmimit. Megjithëse është e kuptueshme që të gjitha këto informacione janë specifike dhe profesionale dhe duhet të pasqyrohen në kartelat klinike, mbetet e paqartë nëse diagnoza, ekzaminimet e nevojshme për përcaktimin e saktë të saj, si dhe saktësia e trajtimit, janë vlerësuar në mënyrë të plotë dhe të detajuar.
