Një ngjarje tragjike ka ndodhur në Shkodër, ku një fëmijë 3-vjeçar ka humbur jetën, ndërsa motra e tij 7-vjeçare është në gjendje kritike. Fëmija i vogël dyshohet se është helmuar, ndërsa 7-vjeçarja është dërguar me urgjencë në QSUT për trajtim të specializuar. Ndërkohë që nëna e fëmijëve është shtatëzënë në javën e 37-të.
Dyshohet se prindërit kanë spërkatur me ilaç kundër minjve një magazinë. Me ta kanë qenë edhe fëmijët të cilët kanë pësuar intoksikacion të rëndë.
Në një njoftim për mediat, Policia e Shkodrës sqaron se dy fëmijët po trajtoheshin në spitalin e Shkodrës për virozë stine.
Mësohet se fillimisht fëmijët kanë marrë trajtim në spital, por më pas kanë larguar drejt banesës.
Sipas Policisë : "Për shkak të rëndimit në gjendjes shëndetësore të fëmijëve, në banesë, më datë 22.02.2025, shtetasi S. H. i ka dërguar përsëri 2 fëmijët për mjekim në Repartin e Pedriatrisë në Spitalin Rajonal Shkodër. Pavarësisht ndihmës mjekësore, 3-vjeçari ka humbur jetën, ndërsa 7-vjeçarja u dërgua në QSUT, për mjekim të specializuar".
Në drejtimin e Prokurorisë vijojnë hetimet për përcaktimin e shkakut të humbjes së jetës së 3-vjeçarit.
