Ekzekutoi dy persona në Berat në vitin e mbrapshtë 1997, prokuroria kërkon dënimin me 25 vite burgim për Byniamin Hajro, i njohur si Bujo Cami.
I cilësuar si kreu i bandës së Vakëfit, akuzohet për veprën penale të ‘Vrasjes me paramendim’ në dëm të dy personave, ngjarje e ndodhur në 3 qershor 1997.
“Nga hetimet rezultoi se i pandehuri, në bashkëpunim me persona të tjerë të paidentifikuar, pasi i kanë rrëmbyer viktimat Arian Avdullai 18 vjeç dhe Eduart Pema 25 vjeç, i kanë futur në një garazhd dhe i kanë tortuar duke i goditur me mjete të forta, me armë zjarri dhe duke i djegur ata të gjallë, duke iu shkaktuar kështu vdekjen. Pas torturave, autorët e veprës penale i kanë tërhequr zvarrë trupat e viktimave me makinë në qytet”, thuhet në pretencën e porkurorisë.
Prokuroria thotë që provoi se i pandehuri Hajro ka vepruar në bashkëpunim me persona të tjerë të paidentifikuar për kryerjen e veprës penale “Vrasja me paramendim”, e kryer në bashkëpunim (dy herë), dhe ka kryer veprën penale duke qenë në rolin e organizatorit dhe ekzekutorit.
