Kozeta Teço dyshohet të jetë vrarë nga i dashuri i saj. Policia e Korçës bëri me dije se Ilirjan Selmani, dyshohet të jetë autori i vrasjes së gruas, me të cilën kishte një lidhje intime. Pasi kreu krimin makabër, ai ndezi disa vatra zjarri në banesë që të zhdukte gjurmët e krimit. Nga hetimet rezulton se ai e ka vrarë Kozeta Teçon me thikë, duke i shkaktuar disa plagë. Sipas dëshmitarëve, i riu pjesëtar i komunitetit rom, kishte lidhje intime, pavarësisht diferencës më shumë se 20-vjeçare në moshë. Gruaja vuante nga probleme të shëndetit mendor dhe shpesh e kërkonte të riun në familje apo në rrugët e qytetit, çka duket se ka agravuar situatën mes tyre. Fillimisht u tha se Kozeta Teço gjeti vdekjen nga asfiksia, për shkak të zjarrit që kishte rënë në banesë. Por më pas ekspertiza mjekoligjore konfirmoi se bëhej fjalë për vrasje.
