“Më hodhi syzet, mirë që nuk mi theu… sapo i kam mbushur 18 vjeç.”
Kështu rrëfen i kamari i ri në Vlorë, i cili u dhunua fizikisht në vendin e punës nga një ish-shefi i qarkullimit në Vlorë, dhe një tjetër person me precedentë penalë. Ngjarja ndodhi në një hotel në zonën e Skelës.
Në një prononcim për mediat, ai u shpreh se, “Erdhën dy zotërinj dhe u ulën në tavolinë. Porosinë e mori dikush tjetër, unë vetëm e shpërndava. Kishin porositur një ujë të madh, një të vogël dhe një makiato. Kur ua çova, njëri më tha: ‘Vetëm një ujë sill, se ai tjetri është rrotë k…’. I thashë që nuk ka problem, e heq ujin, por nuk ka nevojë të shash. Ka ndodhur pa qëllim.”
Por pas këtij shkëmbimi fjalësh, situata agravoi.
“Më ndoqën deri te banaku. I thashë ‘të lutem mos më kap me dorë’. Ishte edhe menaxheri aty. Njëri më qëlloi me shpullë dhe dy herë me grusht në fytyrë dhe qafë.”
Autorët e identifikuar janë Ardian Isufi, ish-shef i qarkullimit në Vlorë, dhe Leart Bino, një person me të kaluar kriminale. Policia ka nisur hetimet për ngjarjen, ndërsa priten masa për ndjekjen penale të të dyshuarve.
