Ardian Gjeloshi, i cili i mbijetoi një atentati në biznesin e tij në Gurrëz të Kurbinit, por që në atë ngjarje mbeti i vrarë ekonomisti i firmës së tij, Selman Mihana, 70-vjecar, është ndër personat e parë të shoqëruar pas vrasjes së Gjovalin Prendit në fshatin Pllanë të Lezhës. Gjeloshi është pyetur për shkak të konflikteve që kishte me Roan Brahimin (Sidorel Prendi) të cilin e dyshonte si një nga personat që organizoi atentatin ndaj tij.
Viktima Gjovalin Prendi është babai i Roan Brahimit, edhe ky i ekzekutuar me 9 maj të 2024 në Athinë. Ardian Gjeloshi ka deklaruar se ndodhej në banesën e tij kur ka ndodhur krimi dhe se nuk ka asnjë lidhje me vrasjen e 64-vjecarit Prendi. Ai ka dorëzuar edhe pamjet e kamerave të sigurisë së banesën, për të provuar alibinë e tij e për këtë arsye është lënë më pas i lirë. Burimet thanë se banesa e tij ishte kthyer në një “burg” që monitorohej nga dhjetra kamera sigurie të instaluara pasi ai i mbijetoi atentatit në Gurrëz. Policia ka verefikuar po ashtu se djali i tij ndodhet në Dubai, ndërsa ka ushtruar kontroll në disa banesa të familjes Gjeloshi.
Familjarët e Roan Brahimit akuzojnë Ardian Gjeloshin për vrasjen e të afërmit të tyre. Policia ende nuk ka të dyshuar, ndërsa po heton konfliktet që kishte Roan Brahimi me disa grupe kriminale, përfshirë dhe Ervis Martinaj, mbretin e kumarit të zhdukur pa gjurmë. Ndërsa është verefikuar që makina e përdorur nga ekzekutorët është vjedhur në Peqin në muajin janar. Armët e krimit nuk janë gjetur, pavarësisht kërkimeve në zonë.
