Sekretari për Organizimin dhe Çështjet Zgjedhore në PS, Damian Gjiknuri, ka paralajmëruar se vota e emigrantëve mund të mos realizohet në zgjedhjet e 2025-ës. Në një intervistë për mediat, Gjiknuri tha se problemi nuk është politik, por kërkon një zgjidhje ligjore.
“Sipas asaj që thotë Ilirjan Celibashi, operatorët e postave shprehin shqetësimin për kohën e dërgimit dhe kthimit të zarfit, pasi sipas tyre është e pamjaftueshme. Problemi nuk është politik, por në momentin që organi i ngarkuar për zbatimin e këtij procesi thotë që vota është në rrezik, ne jemi të shqetësuar dhe mendojmë që duhet të gjejmë një zgjidhje ligjore,” u shpreh Gjiknuri.
Vonesa e KQZ-së për të gjetur një zgjidhje dhe alternativa e Gjiknurit në prag të zgjedhjeve, mund të paralajmërojnë ndonjë shpikje ligjore që mund të mos jetë shumë efikase. Kjo edhe për faktin se në Shqipëri zbatohet për herë të parë vota e emigrantëve.
Mungesa e eksperiencës, por edhe siguria e votës që në vendin tonë nuk garantohet as me metodat tradicionale, janë dy nga arsyet kryesore përse vota e diasporës do të duhej të ishte trajtuar me më shumë seriozitet. Por neglizhenca e KQZ-së ka qenë e qartë, ashtu si dhe pasiguria e forcave politike për peshën elektorale që mund të kenë, na gjen në këtë situatë disa muaj para zgjedhjeve.
Megjithatë, vlen të theksohet se dyshimet mund të jenë të shumta nëse vota e diasporës dështon sërish, pasi tek e fundit bëhet fjalë për një elektorat që nuk kontrollohet me lista patronazhimi.
