Deputetët e Kuvendit të Kosovës nuk arritën as në seancën e 28-të, të mbajtur të shtunën, të konstituojnë përbërjen e re parlamentare, duke vazhduar bllokadën që ka nisur më 15 prill. Seanca zgjati vetëm pak minuta dhe u shty për 9 qershor.
Përplasjet mes partive politike mbeten të thella. Opozita – PDK, LDK, AAK dhe Lista Serbe – refuzon të propozojë anëtarë për komisionin e votimit të fshehtë për kandidaten e Vetëvendosjes, Albulena Haxhiu, e cila nuk ka arritur të sigurojë 61 votat e nevojshme në votim të hapur. LVV këmbëngul në kandidaturën e saj, por për partitë tjera ajo mbetet figurë përçarëse.
Çështja e votimit të fshehtë është dërguar në Gjykatën Kushtetuese për interpretim, ku opozita ka kërkuar pezullim të seancave derisa të merret një vendim. Në këtë situatë, është përmendur mundësia e zgjedhjeve të reja parlamentare, ndoshta të mbajtura njëkohësisht me zgjedhjet lokale në tetor – ide e propozuar fillimisht nga Albulena Haxhiu, por kundërshtuar nga PDK dhe LDK për shkak të vështirësive teknike dhe politike.
Presidentja Vjosa Osmani dhe përfaqësues ndërkombëtarë kanë shprehur shqetësim për vonesat, duke paralajmëruar se ngërçi dëmton kredibilitetin e institucioneve dhe përparimin drejt integrimit euroatlantik. Kuvendi duhet të zgjedhë kryetarin dhe pesë nënkryetarët për të vazhduar me formimin e Qeverisë së re.
