Pas vetëdorëzimit në polici të avokatit Radovan Çela është ekzekutuar edhe vendimi i GJKKO që caktoi ndaj tij masën e sigurisë arrest me burg.
Çela dyshohet për kryerjen e veprave penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë” dhe “Ushtrimi i ndikimit të paligjshëm ndaj personave që ushtrojnë funksione publike”.
“Për këtë shtetas, Gjykata e Posaçme e Shkallës së Parë për Korrupsionin dhe Krimin e Organizuar ka vendosur masën e sigurisë “Arrest me burg” si i dyshuar për kryerjen e veprave penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë” dhe “Ushtrimi i ndikimit të paligjshëm ndaj personave që ushtrojnë funksione publike”. Materialet procedurale i kaluan SPAK-ut, për ndjekje të mëtejshme”, thuhet në njoftimin e policisë.
Kujtojmë se avokati u dorëzua paraditen e sotme në Drejtorinë e Policisë së Tiranës. Ai ishte shpallur në kërkim nga SPAK për dosjen Toyota Auris, në kuadër të së cilës u arrestua dhe drejtuesi i prokurori i Vlorës, Aurel Zarka.
Avokati akuzohet për ushtrim ndikimi të paligjshëm. Nga përgjimet e Sky EÇ ai akuzohet se në bashkëpunim me oficeren Erjona Daupaj dhe Zarkën si dhe biznesmenin Astrit Vladi kanë ndikuar njerëz të drejtësisë për të dhënë një vendim favorizues për të pandehurit e akuzuar për trafikimin e 3.4 mln euro që u bllokuan në Portin e Durrësit.
