Një turist australian, Cameron Twiss, 28 vjeç, nga Adelaide, rezulton i zhdukur gjatë një udhëtimi në luginën e Valbonës, në Tropojë. Pasaporta dhe sendet e tij janë gjetur në bujtinën ku kishte qëndruar, ndërsa ai u pa për herë të fundit pesë javë e gjysmë më parë, kur u nis për një shëtitje nga fshati Valbonë.
Mediat australiane kanë raportuar për zhdukjen e tij, ndërkohë që britanikja “Daily Mail” ka bërë të ditur se autoritetet shqiptare kanë nisur kërkimet dhe se vëllai i Twiss ka udhëtuar në Shqipëri për t’u bashkuar me ekipet e kërkimit.
Sipas hetimeve të deritanishme, Twiss ishte nisur në 13 tetor për të ecur në një shteg të njohur që lidh Valbonën me fshatin Theth, një territor malor i njohur për vështirësinë dhe rrezikshmërinë, sidomos për ata që nuk janë të shoqëruar me një guidë të aftë. Udhëtimi, që përfshin një kalim malor dhe një rrugë 17 km, kalon përmes Alpeve Shqiptare ku nuk ka rrugë. Autoritetet kanë konfirmuar se Twiss ishte nisur i vetëm, ndonëse zakonisht rekomandohet të shoqërohet me udhërrëfyes lokal.
Shërbimi i Kërkimit të Shpëtimit Malor të Kosovës dhe ai i Shqipërisë kanë zhvilluar kërkime në këmbë dhe me dron, por deri më tani nuk kanë pasur rezultatet e pritshme. Kërkimi u pezullua më 2 nëntor, duke pritur informacione të reja për të vazhduar operacionin.
