Presidenti amerikan Donald Trump ka deklaruar se Shtetet e Bashkuara mund të ndërmarrin sulme ajrore ndaj Omanit nëse vendi vijon planet për të bashkëmenaxhuar me Iranin Ngushticën e Hormuzit, një nga rrugët më strategjike të transportit të naftës në botë.
Gjatë një mbledhjeje të kabinetit në Shtëpinë e Bardhë, Trump u shpreh se “Omani do të sillet si të gjithë të tjerët, ose do të na duhet ta godasim”, pa dhënë detaje të mëtejshme.
Deklaratat e tij kanë nxitur reagim të fortë nga Teherani. Ministria e Jashtme e Iranit i cilësoi ato si “të rrezikshme” dhe “kërcënuese”, duke theksuar se përbëjnë shkelje të parimeve bazë të së drejtës ndërkombëtare.
Zëdhënësi i ministrisë, Esmail Baghaei, deklaroi se kërcënimet ndaj Omanit përbëjnë “normalizim të frikësimit në marrëdhëniet ndërkombëtare”, ndërsa vlerësoi rolin ndërmjetësues të Muskatit në stabilitetin rajonal.
Sipas raportimeve, deklaratat e Trump lidhen me bisedime mes Iranit dhe Omanit për vendosjen e tarifave mbi anijet që kalojnë në Ngushticën e Hormuzit, një nyje kyçe për tregtinë globale të energjisë.
Trump, ndërkohë, theksoi se ngushtica “do të mbetet e hapur për të gjithë”, duke shtuar se SHBA do të sigurojë mbikëqyrjen e saj.
Omani, i cili prej dekadash luan rol ndërmjetësues në rajon dhe mban marrëdhënie të ngushta me SHBA-në, nuk ka reaguar ende zyrtarisht ndaj deklaratave.
