Pas deklaratës të kreut të qeverisë Edi Rama për vendosjen e filtrave deri në bllokimin e Tik Tok-ut dhe Snapchatit në Shqipëri, ka nisur firmosja e një peticioni. Në platformën e peticioneve online "Change.org" është hapur një peticion me temë kryesore "Mbylljen e Tik Tok-ut në Shqipëri për të mbrojtur fëmijët tanë". Nismëtarët e peticionin evidentojnë si kryesore faktin që "Edukimi dhe mirëqenia fizike dhe mendore e të rinjve ndikohet negativisht nga Tik Tok-u në Shqipëri". Në vetëm pak orë ka me dhjetëra firmëtarë të kësaj nisme të cilët mesa duket morën spunto nga shqetësimi i kryeministrit Rama i cili tha sot në mbledhjen e qeverisë se " Do të nisim menjëherë një këshillim të gjerë me komunitetet e prindërve në të gjitha shkollat e vendit, për adresimin e dilemës sonë lidhur më bllokimin e plotë apo jo të Tik Tokut a Snapchatit ose të dyjave bashkë".
