Trupi gjykues vendosi shtrim të detyrueshëm në spital psikiatrik për 42-vjeçarin Altjon Sulejmanaj, i cili dyshohet se tentoi të digjte prindërit e tij. Ngjarja ndodhi dy ditë më parë në lagjen “15 Tetori” në Fier, ku prindërit e tij, Shaqir dhe Selside Sulejmanaj, shpëtuan fatmirësisht.
Sulejmanaj doli sot para gjykatës për të marrë njohuri mbi masën e sigurisë. Seanca filloi me një vonesë prej 30 minutash dhe u drejtua nga gjyqtarja Miranda Naka, me avokatin Ervis Hajdarmataj. Gjatë pyetjeve, Sulejmanaj nuk ka pranuar asnjë akuzë. Pas dëgjesës së akuzës dhe mbrojtjes, gjyqtarja Naka vendosi shtrimin e tij në spital psikiatrik.
