Dhjetëra palestinezë u vranë dhe u plagosën si pasojë e një sulmi izraelit në një pallat që strehon të paktën gjashtë familje në qytetin Beit Lahiya të Gazës veriore të dielën, thanë mjekët dhe banorët.
Emergjenca Civile Palestineze tha se në pallatin që u bombardua jetonin 70 persona.
Ndërkaq zyra e mediave të qeverisë së Gazës tha se numri i të vrarëve është 72.
Ushtria izraelite, e cila ka luftuar grupin militant palestinez Hamas në Gaza që nga tetori i vitit 2023, konfirmoi sulmin e kryer gjatë natës në “objektivat terroriste” në Beit Lahiya.
Pas sulmit ajror gjatë natës, të paktën 30 trupa të pajetë nxorën nga rrënojat e ndërtesës pesëkatëshe të shkatërruar, ndërsa dhjetëra banorë janë ende të bllokuar nën rrënoja, tha për AFP zëdhënësi i mbrojtjes civile Mahmoud Basal.
Më herët, ndërsa numri i të vdekurve ishte ende në 26, agjencia e mbrojtjes civile kishte njoftuar se të paktën 59 persona kanë mbetur të bllokuar në rrënoja.
“Shanset për të shpëtuar të plagosurit e tjerë po zvogëlohen për shkak të gjuajtjeve dhe granatimeve të vazhdueshme të artilerisë,” shpjegoi Mahmoud Basal.
Forcat izraelite nisën një operacion tokësor të gjerë në Rripin e Gazës më 6 tetor, duke e cilësuar sulmin si një përpjekej për të parandaluar rigrupimin e militantëve të grupit islamik palestines Hamas. Operacioni nisi në Jabalia dhe më pas u zgjerua neë Beit Lahia.
“Aktivitetet terroriste vazhdojnë në zonën e Beot Lahia”, tha ushtria në një deklaratë të transmetuar nga AFP.
Në deklaratën e tij Hamasi foli për një “masakër” në kontekstin e “luftës gjenocidale (…) kundër civilëve të paarmatosur”.
“Ne vlerësojmë se administrata amerikane është plotësisht përgjegjëse për vazhdimin” e luftës, tha zëdhënësi presidencial i Autoritetit Palestinez Nabil Abu Rubeina nga Ramallah, duke iu referuar sulmeve në Beit Lahia.
Siç tha ai, Shtetet e Bashkuara lejojnë Izraelin “të shmangë çdo përgjegjësi dhe të shkelë rezolutat e ligjit ndërkombëtar” për shkak të mbështetjes së tij politike.
Ministria e Punëve të Jashtme e Autoritetit Palestinez, nga ana e saj, i bëri thirrje komunitetit ndërkombëtar që të marrë “veprim të menjëhershëm” për t’i dhënë fund “mizorive” të kryera kryesisht në Rripin verior të Gazës.
26 persona të tjerë, përfshirë gra dhe fëmijë, u vranë nga bombardimet në jug, në Rafah dhe Khan Younis, si dhe në qendër, në Nuseirat dhe Al Buraiz, shtoi Basal.
“Një sulm izraelit me dron” në Khan Younis “shënjestroi një grup njerëzish të paarmatosur që po garantonin sigurinë e shpërndarjes së ndihmës duke shkaktuar gjashtë vdekje,” tha mbrojtja civile.
Ministria e Jashtme izraelite denoncoi si “të njëanshëm” dhe “anti-izraelit” një raport të fundit të komitetit special të OKB-së, sipas të cilit metodat e luftës të përdorura nga Izraeli në Rripin e Gazës “përputhen me karakteristikat e një gjenocidi”.
