Një studim statistikor mbi besimin fetar në Shqipëri, i financuar nga Fondacioni Gjerman Konrad Adenauer, ka treguar se 59% e të anketuarve, pavarësisht prejardhjes familjare, besojnë plotësisht në një fe të caktuar. Ndërsa 56% prej tyre besojnë në fenë e origjinës familjare. Një grup tjetër prej 33.8% të të anketuarve besojnë në ekzistencën e Zotit, por jo në ndonjë fe të caktuar.
Feja myslimane mbetet më e përhapura në Shqipëri, me 36% të të anketuarve që janë deklaruar si besimtarë të Islamit.
Kategoria më e besuar: Brezi i vjetër
Besimi në një fe të caktuar është më i pranishëm tek individët e moshës 65 vjeç e lart. Ndërsa brezi më i ri (18-39 vjeç) beson pak më shumë se brezi i mesëm (40-64 vjeç). Ndërsa te katolikët, përqindja më e lartë e besimtarëve gjendet tek brezi i mesëm, që është formuar në periudhën e komunizmit. Kjo mund të shpjegohet si një formë rezistence ndaj shtetit. Nëse shohim te myslimanët sunitë, përqindja më e madhe e besimtarëve është te brezi më i ri, duke u dalluar nga brezi i mesëm dhe duke krijuar një përjashtim nga tabloja e përgjithshme.
Frekuentimi i vendeve të kultit: Pavarësisht besimit, shifra mbetet e ulët
Pavarësisht se shumica e të anketuarve besojnë në një fe të caktuar, frekuentimi i rregullt i vendeve të kultit, si xhamitë, kishat apo teqetë, mbetet shumë më i ulët. Megjithatë, festat fetare janë ato që tërheqin më shumë besimtarë në këto vende të kultit.
Ndikim edhe niveli arsimor
Të anketuarit që besojnë në një fe të caktuar kanë një nivel relativisht të ulët arsimor. Sipas të dhënave, 71.6% e të anketuarve që besojnë në një fe të caktuar kanë një arsim të kufizuar, duke mos e vazhduar shkollën e mesme ose duke e përfunduar atë. Në anën tjetër, 28.8% e të anketuarve që besojnë në fe kanë përfunduar studimet universitare.
Studimi është përgatitur nga shkrimtari Bashkim Shehu dhe analisti Eduard Zaloshnja, duke përdorur një kampion të shtresëzuar prej 820 të anketuarish të moshës 18 vjeç e lart.
