Pas tre vitesh në krye të pankinës së Shqipërisë, emri i Sylvinho-s vazhdon të qarkullojë fuqishëm në arenën ndërkombëtare. Trajneri brazilian fitoi vëmendjen e futbollit botëror duke arritur të dërgojë kuqezinjtë në “Euro2024”, si dhe për herë të parë në historinë e përfaqësueses sonë, në fazën “play-off” të një Botërori. Përballjet me gjigantë si Italia, Kroacia dhe Spanja i shtuan atij edhe më shumë peshë në aspektin personal, aq sa në një moment u vu në diskutim vijimi i kontratës së tij me FSHF-n, pavarësisht se ishte ende në fuqi.
Sot situata ka marrë tjetër drejtim. Kontrata e Sylvinho-s përfundon në korrik dhe palët duken më larg se kurrë. Edhe brenda zyrave të FSHF-së nuk ka siguri nëse duhet të ofrohet një rinovim, duke krijuar paqartësi për të ardhmen e stolit kuqezi.
Ndërkohë, në Brazil ka nisur të qarkullojë sërish emri i Sylvinho-s. Mediat vendase raportojnë se Corinthians, skuadra ku ai ka qenë trajner më herët, po shfaq interes për rikthimin e tij. Braziliani ka drejtuar ekipin në periudhën maj 2021 – 2 shkurt 2022, ku u shkarkua pas humbjes ndaj Santos. Në 44 ndeshje me Corinthians, ai regjistroi 17 fitore, 14 barazime dhe 13 humbje.
E ardhmja e Sylvinho-s mbetet e hapur, dhe ndërsa Corinthians po vëzhgon, FSHF-ja duhet të vendosë nëse do të vazhdojë bashkëpunimin me trajnerin që e çoi Shqipërinë drejt dy sukseseve historike.
