Jose Mourinho është rikthyer në qendër të diskutimeve për stolin e Real Madridit, në një periudhë kur klubi madrilen po shqyrton ndryshime të mundshme në drejtimin teknik.
Trajneri portugez, aktualisht i kontraktuar me Benficën deri në vitin 2027, po përmendet si një nga kandidatët seriozë për të marrë drejtimin e Real Madrid në rast se klubi vendos të ndryshojë trajner.
Sipas raportimeve, kontrata e tij me Benfica përfshin një klauzolë largimi prej rreth 7 milionë eurosh, e cila mund të aktivizohet në fund të sezonit, duke e bërë çdo lëvizje të mundshme të varur nga një vendim i shpejtë i drejtuesve madrilenë.
Burime nga Portugalia bëjnë të ditur se vetë Mourinho është i hapur për një rikthim në Madrid, aty ku në periudhën e tij të parë arriti rezultate të rëndësishme dhe la një gjurmë të fortë si në aspektin sportiv, ashtu edhe në atë mediatik.
Nga ana tjetër, Benfica po përpiqet të mbajë stabilitetin e projektit, ndërsa Mourinho vazhdon të ketë objektiva me ekipin deri në fund të sezonit, pavarësisht se performancat e paqëndrueshme dhe eliminimi nga garat evropiane kanë shtuar presionin mbi të.
Një rikthim i tij në La Liga do të sillte menjëherë vëmendje të madhe në futbollin spanjoll, duke qenë se ai mbetet një nga trajnerët më karizmatikë dhe më të komentuar në futbollin evropian.
Për Real Madridin, një emërim i mundshëm i Mourinhos do të përfaqësonte një mesazh të fortë për rikthimin e disiplinës dhe mentalitetit fitues, megjithatë drejtuesit duhet të peshojnë me kujdes nëse ia vlen të paguajnë klauzolën apo të zgjedhin alternativa të tjera pa kosto.
