Deputeti socialist Erion Braçe ka ashpërsuar tonet ndaj ministrit të Bujqësisë Andis Salla, gjatë një interpelance të kërkuar prej tij në Kuvend lidhur me trajtimin e kafshëve të rrugës, groposjen dhe djegien e tyre pas ngordhjes.
Por në vend të ministrit të Bujqësisë, në sallë ishte paraqitur ministri për Pushtetin Vendor Ervin Demo, gjë që ka sjellë reagimin e menjëhershëm të Braçes, i cili e konsideroi mungesën e Sallës si mungesë respekti ndaj Kuvendit dhe një përpjekje për t’iu shmangur përgjegjësisë politike.
“Është mungesë e thellë respekti ndaj Kuvendit. Një mungesë respekti që nuk fsheh paaftësinë epike për të lexuar, jo thjesht për të mos bërë punën”, deklaroi Braçe nga foltorja.
Deputeti socialist tha se askush nuk mund të përcaktojë në vend të tij se me cilin ministër duhet të zhvillojë interpelancën, duke sulmuar jo vetëm ministrinë, por edhe mënyrën sesi, sipas tij, po administrohen procedurat parlamentare.
“Nuk mund të përcaktojë një kryetar grupi me kë unë duhet të bëj interpelancë. Nuk mund të përcaktojë një ministër nëse do e bëjë ai apo një ministër tjetër interpelancën time me të. Nuk mund ta përcaktojë as zyra e përgatitjes plenare”, tha Braçe.
Në një moment ironik, ai foli edhe për “rregullin e përtacërisë mendore” që, sipas tij, po dominojnë institucionet.
Pavarësisht mungesës së ministrit të Bujqësisë, Braçe deklaroi se do ta vijojë interpelancën, pasi, siç u shpreh ai, “dua të bëj punën time”.
Përplasja është një tjetër episod i tensioneve të vazhdueshme mes Braçes dhe ministrit të Bujqësisë, të cilin deputeti socialist e ka kritikuar vazhdimisht muajt e fundit për mënyrën e menaxhimit të sektorit.
