FC Barcelona ka reaguar zyrtarisht pas konferencës së fundit për shtyp të presidentit të Real Madrid, Florentino Perez, ku u rikthye sërish në qendër të vëmendjes çështja e njohur “Negreira”, duke ndezur tensionet mes dy klubeve më të mëdha në Spanjë.
Në reagimin e saj zyrtar, Barcelona thekson se departamenti ligjor i klubit po i shqyrton me kujdes deklaratat dhe akuzat e bëra nga Perez gjatë konferencës për media, duke shtuar se çdo hap i mundshëm ligjor po vlerësohet me seriozitet maksimal.
“Lidhur me konferencën për shtyp të mbajtur nga presidenti i Real Madridit, Florentino Perez, informojmë se departamenti ynë ligjor po shqyrton me kujdes deklaratat dhe akuzat e tij. Ato aktualisht po analizohen dhe po vlerësohen hapat që duhen ndërmarrë. Kur të konsiderohet e përshtatshme, çdo qëndrim dhe vendim i marrë do të njoftohet”, thuhet në reagimin e klubit katalanas.
Deklarata vjen pas akuzave të forta të bëra nga Florentino Perez, i cili gjatë një konference për media deklaroi se Real Madrid po përgatit një dosje prej 600 faqesh që do t’i dorëzohet UEFA-s, lidhur me rastin “Negreira”. Sipas tij, bëhet fjalë për një çështje pa precedent në historinë e futbollit botëror.
Perez theksoi gjithashtu se klubi madrilen dhe anëtarët e tij janë të vendosur në ndjekjen e këtij rasti, duke shtuar se akuzat për korrupsion të supozuar ndaj Barcelonës janë të papranueshme dhe kërkojnë sqarim në të gjitha instancat përkatëse.
Ai ngriti gjithashtu akuza të forta ndaj strukturave të futbollit evropian, duke përmendur UEFA-n dhe proceset e brendshme të saj, ndërsa theksoi se Real Madrid do të vazhdojë betejën ligjore dhe institucionale në lidhje me këtë çështje.
Rikthimi i debatit për rastin “Negreira” ka rindezur përplasjet mes dy rivalëve historikë, ndërsa pritet që zhvillimet e mëtejshme të sjellin reagime të reja si nga klubet, ashtu edhe nga institucionet e futbollit evropian.
