Mirlinda Karçanaj ka komentuar edhe akuzat që rëndojnë ndaj saj për “Shkelje të barazisë së pjesëmarrësve në tendera apo ankande publike”, kryer në formën e grupit të strukturuar kriminal, si edhe për “Grup i strukturuar kriminal” dhe “Kryerje të veprave penale nga organizata kriminale dhe grupi i strukturuar kriminal”.
Në deklaratat e saj në Top Channel, Karçanaj tha se ka pasur gjithmonë respekt për profesionin e prokurorit dhe për punën e SPAK-ut, edhe pse sot ndodhet vetë nën hetim.
“Unë kam respekt për punën e profesionistëve dhe të prokurorëve, madje para se të më kthehej bota përmbys. E kam parë SPAK-un me admirim, ndonëse e kam në kurriz si në ëndrrën time më të keqe”, deklaroi ajo.
Ish-drejtoresha e AKSHI-t u shpreh se beson se procesi ndaj saj do të bazohet mbi prova dhe dokumente dhe jo mbi perceptime publike apo video “të nxjerra jashtë kontekstit”.
“Nuk besoj se prokurorët dhe gjyqtarët do të jenë të padrejtë me mua pasi të më pyesin dhe të hetojnë provat dhe dokumentat, dhe jo me video të nxjerra nga konteksti”, tha Karçanaj.
Ajo la të kuptohet gjithashtu se klima publike dhe mediatike ka ndikuar në mënyrën si është perceptuar çështja, duke sugjeruar se edhe raportimet mediatike kanë kontribuar në tensionin dhe paragjykimin publik ndaj saj.
