Mirlinda Karçanaj ka komentuar për herë të parë publikisht raportin e saj me Ergys Agasi dhe hetimet që lidhen me procedurat në AKSHI, duke deklaruar se kontaktet institucionale nuk mund të interpretohen automatikisht si përgjegjësi penale.
Në intervistën e saj në Top Story me Grida Duma, Karçanaj tha se Agasin e njeh nga koha kur ai ushtronte funksione në administratën publike dhe se marrëdhënia mes tyre ka qenë “korrekte si me të gjithë drejtuesit”.
“ Në funksione publike është e domosdoshme të kesh kontakte, sepse në të kundërt nuk bëhet puna. Por kontaktet nuk mund të shndërrohen në përgjegjësi penale”, deklaroi ajo.
Karçanaj u shpreh se nuk i takon asaj të përcaktojë nëse Agasi ka apo jo përgjegjësi penale, duke theksuar se kjo është detyrë e akuzës dhe e procesit hetimor.
“Mund të ketë faj, nuk më takon mua ta them këtë. I takon akuzës të hetojë duke analizuar provat dhe dokumentat dhe më pas të dalë në përfundime”, tha ish-drejtoresha e AKSHI-t.
Sa i përket rolit të saj në institucion, Karçanaj deklaroi se drejtimi i AKSHI-t ka qenë i orientuar drejt zbatimit të ligjit dhe respektimit të procedurave.
“Ajo që mund të them për veten është se mënyra si e kam drejtuar institucionin ka qenë qartësisht e orientuar që të zbatohet ligji, të mos shkelet asnjë procedurë dhe gjithçka të jetë konform ligjit”, u shpreh ajo.
Karçanaj shtoi se fokusi i saj kryesor nuk kanë qenë prokurimet, por zhvillimet teknologjike të institucionit.
“Sa i takon prokurimeve, kam zgjedhur të mos merrem me të përditshmen. Madje kam deleguar rolin e titullarit të prokurimeve. Nuk i kam ndjekur prokurimet”, deklaroi ajo.
