Rektorët e universiteteve, që në një vend normal përfaqësojnë elitën intelektuale dhe udhëheqin grupe të rëndësishme të shoqërisë, sot morën “leksione” akademike nga Elisa Spiropali. Kryetarja e Kuvendit zhvilloi një takim këtë të premte me rektorë dhe përfaqësues të institucioneve të arsimit të lartë, publike dhe private, me shqetësimin kryesor të fokusuar te financimi. Zonja Spiropali u dha rektorëve këshilla mbi mënyrat se si universitetet mund të përdorin metoda inovative për të rritur financimet dhe për të forcuar lidhjet mes sektorit publik dhe privat.
Sipas saj, “Thelbësore është krijimi i platformave të bashkëpunimit mes universiteteve dhe Kuvendit, duke nxitur projekte të përbashkëta kërkimore dhe mbështetur inovacionin në fusha strategjike.”
Takimi, më shumë se një diskutim i nivelit akademik, ngjante me një takim politik elektoral, ndërkohë që ata që duhet të jenë modeli për politikanët, mbanin shënim këshillat e Spiropalit. Në çdo vend normal të qytetëruar, është utopike që rektorët, ajka e mendjeve të ndritura dhe burimi kryesor i dijes dhe inovacionit, të bëhen nxënësit e politikës. Por kur e mendon se disa prej tyre në fakt titujt akademikë i kanë fituar me punime plagjiaturë, ndoshta ajo që meritojnë është të dëgjojnë Elisen dhe spiropalizimin e asaj pak jete akademike që mund të ketë Shqipëria.
