Grupi Parlamentar i Partisë Demokratike ka depozituar sërish një padi në SPAK ndaj zëvendëskryeministres dhe Ministres së Infrastrukturës dhe Energjisë, Belinda Balluku. Kreu i grupit parlamentar të PD-së, Gazment Bardhi, deklaroi se Balluku ka shpërdoruar rreth 180 milionë euro përmes shitjes së energjisë brenda një viti.
Sipas Bardhit, Ministrja e Energjisë, në rolin e Kryetares së Asamblesë së Përgjithshme të KESH-it, është personi përgjegjës për shpenzimet dhe bilancet e kësaj kompanie shtetërore. Ai denoncoi gjithashtu një tjetër abuzim, duke theksuar se Balluku ka manipuluar shifrat e humbjeve të energjisë në rrjet. Sipas tij, humbjet faktike arrijnë në nivelin 27.2%, duke shkaktuar për vitin 2023 një dëm prej 144 milionë eurosh.
Bardhi kërkoi nga SPAK-u një hetim të shpejtë dhe të thelluar për këto shkelje të rënda ligjore dhe për abuzimin me fondet publike.
