SPAK i ka komunikuar kryebashkiakut të Tiranës, Erion Veliaj se po hetohet dhe për një akuzë të re. Atë të futjes dhe mbajtjes së sendeve të palejuara në burg.
“Futja ose mbajtja e sendeve të ndaluara në institucionin e ekzekutimit të vendimeve me burgim, të cilat, sipas legjislacionit në fuqi, janë të ndaluara, dënohet me burgim nga një deri në tre vjet.
Po kjo vepër, kur kryhet në bashkëpunim, më shumë se një herë ose nga personi që ka për detyrë ruajtjen dhe sigurinë fizike ose që për shkak të detyrës ose profesionit ka të drejtë të hyjë në institucione burgimi, dënohet me burgim nga pesë deri në dhjetë vjet.””, parashikon neni 324 i Kodit Penal.
Cfarë ka ndodhur në rastin e z.Veliaj? Kur toga e policisë së burgjeve po e shoqëronte nga paraburgimi i Durrësit për në Gjykatën e Apelit të Posacëm, kryebashkiaku ka përdorur telefonin e një prej punonjësve të policisë. Ai ka kryer telefonata, një prej të cilave me bashkëshorten e tij Ajola Xoxa, telefonatë e cila është përgjuar për shkak se numri i saj ishtë në përgjim.
Para hetuesve të BKH-së polici e ka pranuar se Veliaj ka përdorur telefonin e tij, pasi është vënë para fakteve të pakundërshtueshme. Ndaj për këtë episod ndaj Veliaj është ngritur akuza e re. Ai po hetohej ndërkohë për korrupsion e pastrim parash.
