GJKKO i ka komunikuar masën e sigurisë “arrest në burg” Lulzim Berishës, i cili akuzohet për vrasjen e Klodian Saliut. Më herët, çështja për akuzën e vrasjes së Vajdin Lamajt dhe Artan Arsit është pushuar.
Prova më e fortë që SPAK ka kundër tij është dëshmia e të penduarit të drejtësisë, Luftar Reçi.
“Nuk e njoh fare atë njeri, nuk e kam takuar askund. Nëse më provoni një kontakt, më dënoni sa të doni. Njëlloj siç më ra akuza tjetër, njëlloj do të bjerë edhe kjo,” deklaroi Berisha, duke kundërshtuar dëshminë e Reçit.
Ish-kreu i bandës së Durrësit u ekstradua dy ditë më parë nga Spanja.
Njoftimi
1. Kërkuesi Prokuroria e Posaçme Kundër Korrupsionit dhe Krimit të Organizuar
me datë 19.03.2025 ka paraqitur pranë Gjykatës kërkesën me objekt: “1. Marrje në pyetje të personit të arrestuar dhe verifikimin e kushteve të zbatimit të masës së sigurimit, për të arrestuarin Lulzim Berisha, në lidhje me procedimin penal nr. 252, të vitit 2020; 2.
Vazhdimin e masës së sigurimit personal “arrest në burg” të parashikuar nga neni 238 i
K.Pr.Penale, të caktuar me vendimin Nr. 115, datë 02.12.2020 të Gjykatës së Posaçme të
Shkallës së Parë për Korrupsionin dhe Krimin e Organizuar, ndaj të arrestuarit Lulzim Berisha”
2. Në përfundim të gjykimit, Gjykata e Posaçme e Shkallës së Parë për Korrupsionin dhe
Krimin e Organizuar me trup gjykues të përbërë nga gjyqtarja Irena Gjoka, me vendimin
Nr. 35, datë 20.03.2025 vendosi:
1. Vazhdimin e zbatimit të masës së sigurimit personal me karakter shtrëngues “arrest në burg” e parashikuar nga neni 238 i K.Pr.Penale, caktuar me vendimin. Nr.115, datë 02.12.2020 të Gjykatës së Posaçme të Shkallës së Parë për Korrupsionin dhe Krimin e Organizuar, ndaj të pandehurit Lulzim BERISHA, i biri i A. dhe i R., i datëlindjes ****, lindur dhe banues në ****, me shtetësi ****, me arsim ****, me gjendje gjyqësore ****, me gjendje civile ****, me ****, I DYSHUAR: Për kryerjen e veprave penale “Vrasja me paramendim” në dëm të shtetasit K.S, “Vrasja me dashje”, mbetur në tentativë, në dëm të shtetasit O.T, “Mbajtja pa leje dhe prodhimi i armëve, armëve shpërthyese dhe municionit”, kryer në bashkëpunim, në formën e grupit të strukturuar kriminal, “Kryerja e veprave penale nga organizata kriminale dhe grupi i strukturuar kriminal”, të parashikuara përkatësisht nga nenet 78/2, 76/22, 278/1, 28/4 dhe 334/1/2 të Kodit Penal.
2. Për ekzekutimin e ketij vendimi, ngarkohet Prokuroria e Posaçme Kundër Korrupsionit dhe Krimit të Organizuar, prokurorët E.K dhe A.Sh.
3. Kundër këtij vendimi lejohet e drejta e ankimit nga palët, brenda pesë ditëve, në Gjykatën e Posaçme të Apelit për Korrupsionin dhe Krimin e Organizuar, duke filluar ky afat nga e nesërmja e komunikimit të këtij vendimi.
Tiranë, më datë 20.03.2025
