Agron Duka ishte i vetëmi kryetar grupi parlamentar që foli për skandalin e mbetjeve toksike në hapjen e sesionit të ri Parlamentar. Duka tha se qeveria u soll në mënyrë të papërgjegjshme me mbetjet toksike të kompanisë Kurum.
Sipas tij nëse doganat, Ministria e Mjedisit, Autoriteti Portual, Policia dhe kontrolli Kufitar nuk kanë ditur gjë, atëherë në Portin e Durrësit shkarkohet lloj lloj malli. Duka gjithashtu mbështeti çdo interpelancë që mund të bëhet për të bërë transparencë për këtë çështje.
“Dua të ngre shqetësimin për mbetjet toksike të kompanisë Kurum. Qeveria dhe shteti u sollën në mënyrën më shembullore të papërgjegjshmërisë. Fshehën kokën dhe përgjegjësitë. Ata nuk dinë asgjë, as dogana, as Ministria e Mjedisit, as Autoriteti Portual, as Policia dhe as kontrolli Kufitar. Nëse vërtet nuk di gjë, tregon se ai është shpartalluar në atë masë sa për muaj e vite më radhë, vinçat shkarkojnë lloj lloj malli dhe nuk dinë asgjë. I bashkohen cdo kërkese për interpelancë për të bërë transparencë për këtë çështje . Nuk mund të lejojmë që në një vend ku ndodhin këto skandale me këto pasoja katastrofike mjedisore, të shikojmë videoklipet e qeveritarëve që dalin në televizion me qese në dorë duke pastruar vendin”, tha Duka.
Ndërkohë nga ana tjetër kreu i grupit parlamentar të PD, Gazment Bardhi i cili para disa ditësh paralajmëroi edhe interpelancën me kryeministrin Rama për këtë skandal, në fjalën e tij foli për shumë çështje ndërsa për mbetjet toksike nuk tha asnjë fjalë. Qoftë edhe për të akuzuar qeverinë për papërgjegjshmërinë e saj në skandalin e mbetjeve.
