Është shtyrë sërish seanca paraprake ndaj kreut të Partisë Demokratike, Sali Berisha, dhëndrit të tij, Jamarbër Malltezi, dhe dy të pandehurve të tjerë në kuadër të dosjes “Partizani”. Seanca u zhvillua për rreth 40 minuta në Gjykatën e Posaçme, ku mbrojtja e Malltezit paraqiti disa prova shkresore.
Megjithatë, procesi u ndërpre pasi një nga mbrojtësit kërkoi shtyrjen e seancës për shkak të një angazhimi tjetër profesional.
Berisha, Malltezi dhe ndërtuesi Fatmir Bektashi janë të akuzuar nga SPAK për korrupsion në lidhje me çështjen e privatizimit të ish-kompleksit sportiv “Partizani”. Procesi gjyqësor pritet të vijojë në një datë të re që do të caktohet nga gjykata.
