Disa persona janë plagosur pasi një shpërthim shkatërroi një bllok apartamentesh trekatëshe në Hagë.
Shkaku i shpërthimit në lagjen Mariahoeve të këtij qyteti holandez mbetet i paqartë. Autoritetet e emergjencës thanë se katër persona janë shpëtuar dhe janë dërguar në spital, por nuk mund të përcaktojnë se sa persona mund të jenë ende nën rrënoja.
Autoambulanca janë parë të rreshtuara, duke pritur mundësinë e më shumë viktimave. Një zëdhënës i spitalit lokal tha se ata janë në gatishmëri për të trajtuar të plagosurit. Banorët e lagjes verilindore thanë se kishin dëgjuar një shpërthim të fuqishëm dhe ulërima para agimit. Një grua i tha mediave lokale se mendonte se kishte ndodhur një tërmet.
Shërbimi i zjarrfikësve të Hagës tha: “Në këtë moment, shërbimet e emergjencës janë të angazhuara në shpëtimin dhe kërkimin e njerëzve dhe në shuarjen e zjarrit.”
Një reporter i Agence France-Presse në vendngjarje tha se aty ndodheshin dhjetëra zjarrfikëse, ndërsa zjarrfikësit luftonin me flakët nga toka dhe nga pozicione të ngritura. Rrënojat ishin shpërndarë nëpër rrugë dhe disa dritare në afërsi ishin thyer nga shpërthimi, tha reporteri. Shtëllunga tymi të mëdha dilnin nga një vrimë e madhe ku më parë qëndronte ndërtesa, me një erë të rëndë në ajër.
Zyrtarët e qytetit thanë: “Zjarri po lëshon shumë tym në zonën përreth. Banorët këshillohen të mbyllin dritaret dhe dyert dhe të fikin ventilimin.” Kryebashkiaku i Hagës, Jan van Zanen, ishte në vendngjarje për të koordinuar përpjekjet e shpëtimit, sipas faqes së lajmeve Regio15.
Banesa në disa kate duket se ishin shkatërruar nga shpërthimi, tha Regio15. Pamjet e para nga transmetuesi publik NOS tregonin dhjetëra zjarrfikës që luftonin me flakët dhe hapnin dyer për të hyrë në ndërtesë. Një fotografi nga agjencia lokale e lajmeve ANP tregonte një person që po dërgohej në një barelë drejt një autoambulance.
Autoritetet holandeze dërguan një ekip të specializuar urban të kërkim-shpëtimit në vendngjarje, duke përfshirë katër qen të trajnuar për të gjetur viktima. Ky ekip ishte përdorur më parë gjatë tërmetit shkatërrues në Turqi në vitin 2023.
The Guardian
