Sekretari amerikan i Shtetit, Marco Rubio, ka deklaruar se Shtetet e Bashkuara janë “shumë të shqetësuara” për situatën në Siri, pas sulmeve izraelite ndaj Damaskut.
“Do të punojmë për këtë çështje menjëherë. Sapo kam mbyllur telefonatën me palët përkatëse. Jemi shumë të shqetësuar dhe shpresojmë të kemi përditësime gjatë ditës,” është shprehur Rubio, sipas agjencisë Reuters.
Diplomati i lartë amerikan tha gjithashtu se SHBA dëshiron që luftimet të ndalen, pas kolapsit të një armëpushimi mes forcave qeveritare siriane dhe luftëtarëve lokalë druzi në jug të vendit.
Ndërkohë, ushtria izraelite ka konfirmuar se ka goditur selinë e ushtrisë siriane në Damask si dhe një “objektiv ushtarak” pranë pallatit presidencial.
“Forcat [ushtarake] po monitorojnë nga afër zhvillimet dhe veprimet e regjimit kundër civilëve druzi në jug të Sirisë. Në përputhje me udhëzimet e instancave politike, [forcat] po ndërmarrin sulme në zonë dhe mbeten të përgatitura për skenarë të ndryshëm,” thuhet në një njoftim në Telegram.
Sipas Ministrisë së Shëndetësisë së Sirisë, deri tani një person ka humbur jetën dhe 18 të tjerë janë plagosur nga sulmet izraelite në Damask.
