Zyra e të Drejtave të Njeriut e Kombeve të Bashkuara (OHCHR) ka njoftuar sot se të paktën 875 palestinezë janë vrarë gjatë gjashtë javëve të fundit ndërsa prisnin ndihma humanitare në Gaza.
Sipas raportit, shumica e viktimave – 674 persona – kanë humbur jetën pranë pikave të shpërndarjes së Fondacionit Humanitar të Gazës (FHG), një organizatë e mbështetur nga Shtetet e Bashkuara dhe Izraeli. Ndërkohë, 201 të tjerë janë vrarë përgjatë rrugëve të autokolonave humanitare të drejtuara nga organizata të tjera, përfshirë Kombet e Bashkuara.
FHG përdor kompani private sigurie dhe logjistike për të qarkulluar furnizimet, duke anashkaluar në pjesë të madhe sistemin zyrtar të shpërndarjes së ndihmave të OKB-së. Zyrtarët izraelitë kanë deklaruar prej kohësh se kjo mënyrë operimi është më e sigurt, duke pretenduar se rrjetet e Hamasit shpesh plaçkisin rezervat ushqimore që dërgohen për popullatën civile.
Nga ana tjetër, përfaqësuesit e FHG-së i kanë mohuar të gjitha incidentet e raportuara pranë pikave të shpërndarjes së tyre, duke akuzuar Kombet e Bashkuara për “keqinformim të qëllimshëm dhe shpifje politike”.
OHCHR ka theksuar se bilanci i viktimave mund të rritet, pasi shumë nga të plagosurit janë në gjendje kritike dhe verifikimi i informacionit mbetet i vështirë për shkak të kufizimeve të qarkullimit dhe mungesës së aksesit të pavarur në të gjithë zonën e konfliktit.
