Allen Ganao, vogëlushi 5-vjeçar që kishte zhdukur prej të premtes në mbrëmje nga kampingu “Por la Mar” në zonën Latte të Ventimiglias, është gjetur i gjallë mëngjesin e së dielës, pas një operacioni kërkimi që mobilizoi autoritetet dhe qindra vullnetarë.
Lajmi i shpëtimit ka sjellë lehtësim dhe emocione të forta jo vetëm për familjen, por edhe për gjithë komunitetin lokal, i cili për 36 orë me radhë kishte frikën më të madhe – që djaloshi mund të kishte humbur jetën i vetëm në pyll.
Fëmija u gjet i vetëm, në këmbë, rreth tre kilometra larg vendit ku ishte zhdukur. Ai ndodhej pranë një ndërtese të vogël, afër një antene telefonike, ku kishte kaluar dy net i strehuar pranë një shtylle betoni. Sipas raportimeve të ekipeve të shpëtimit, Allen ishte shumë i dehidratuar, por në gjendje të mirë shëndetësore dhe pa plagë të rënda.
Zbulimi u bë nga një banor lokal, i cili kishte marrë pjesë në kërkime si vullnetar. Ndërhyrja përfundimtare u krye nga një ekip i mbrojtjes civile, të cilët e morën menjëherë në kujdesin e tyre mjekësor.
Tre shpëtimtarët që gjetën djalin – Matteo Trecci, Edoardo Campione dhe Dario Mattaudi – u kthyen në vendin ku ndodheshin prindërit e vogëlushit mes duartrokitjeve dhe lotëve të gëzimit. Ata janë përshëndetur si heronj nga të gjithë të pranishmit.
Babai i vogëlushit, Bernardo Ganao, falënderoi të gjithë ata që nuk u dorëzuan në kërkime:
“Ishim të frikësuar. Këto ishin ditë të tmerrshme. Gjithçka shkoi mirë. Jemi të lehtësuar dhe shumë të lumtur,” – tha ai para gazetarëve.
Prefekti i Imperias, Valerio Massimo Rome, deklaroi se kërkimet fillestare kishin qenë jashtëzakonisht të vështira, pavarësisht përfshirjes së dy helikopterëve, dronëve dhe pajisjeve zanore për thirrje. Prindërit e Allen, të dëshpëruar, madje kishin përdorur këngët e tij të preferuara gjatë natës për të tërhequr vëmendjen e djalit.
Pas mbërritjes së ambulancës, vogëlushi iu nënshtrua kontrolleve mjekësore për të shmangur rrezikun e dehidrimit dhe hipotermisë. Mjekët kanë konfirmuar se, për mrekulli, gjendja e tij shëndetësore është e qëndrueshme dhe nuk ka nevojë për trajtime të specializuara.
Ky episod ka tronditur opinionin publik italian, ndërsa solidariteti i qytetarëve dhe mobilizimi i strukturave të emergjencës janë përmendur si shembull frymëzues i ndërhyrjes së shpejtë dhe bashkëpunimit mes komunitetit dhe autoriteteve.
Vogëlushi tashmë ndodhet pranë familjes së tij, ndërsa hetimet paraprake pritet të zbulojnë se si arriti të largohej i vetëm nga kampingu dhe të humbiste gjurmët për më shumë se një ditë e gjysmë.
