Detyrimet e prapambetura të institucioneve publike kanë shënuar rritje gjatë tremujorit të parë të vitit 2026, pasi kishin pësuar ulje të ndjeshme në fund të vitit të kaluar. Sipas të dhënave zyrtare, niveli i borxheve ka arritur në rreth 6.93 miliardë lekë, ose 1.1 miliardë lekë më shumë krahasuar me fundin e vitit 2025.
Të dhënat e publikuara nga Ministria e Financave tregojnë se vetëm detyrimet e prapambetura të bashkive në muajin mars 2026 kapin vlerën e rreth 3.15 miliardë lekëve, duke regjistruar një rritje të lehtë krahasuar me fundvitin.
Në korrik të vitit 2025, Ministria e Financave u kishte kërkuar zyrtarisht njësive të qeverisjes vendore të hartonin dhe zbatonin një plan të detyrueshëm për shlyerjen graduale të borxheve. Bashkive iu kërkua të forconin disiplinën financiare, të shmangnin krijimin e detyrimeve të reja dhe të përdornin një pjesë të të ardhurave për likuidimin e borxheve ekzistuese.
Megjithatë, sipas analizës së fundit, një pjesë e bashkive nuk kanë arritur të përmbushin objektivat e vendosura. Disa prej tyre jo vetëm që nuk i kanë ulur detyrimet, por kanë regjistruar edhe rritje të stokut të borxhit deri në mars 2026.
Nga raporti rezulton se pesë bashkitë me nivelin më të lartë të detyrimeve të prapambetura janë Kavaja, Pogradeci, Vora, Tirana dhe Dimali.
