Roma është përfshirë nga një atmosferë zie për varrimin solemn të Papa Françeskut. Ceremonia do të zhvillohet sot, në orën 10:00, në Sheshin e Shën Pjetrit, ku mijëra besimtarë dhe personalitete të larta nga mbarë bota janë mbledhur për t’i dhënë lamtumirën e fundit Atit të Shenjtë.
Që në orët e para të mëngjesit, zona përreth Vatikanit, përfshirë Via della Conciliazione dhe rrugët përreth, është mbushur me njerëz të thjeshtë, besimtarë dhe përfaqësues shtetesh. Portat për publikun janë hapur në orën 05:30, ndërsa pritet që mbi 200 mijë vetë të marrin pjesë në ceremoninë e varrimit, pa përfshirë ata që do të qëndrojnë përgjatë rrugës së kortezhit funeral, deri te bazilika e Santa Maria Maggiore, ku do të bëhet varrimi.
Për garantimin e sigurisë janë angazhuar mbi 4.000 forca policie dhe po aq vullnetarë nga Mbrojtja Civile, ndërsa janë konfirmuar 160 delegacione zyrtare nga shtetet dhe qeveritë e botës.
Procesioni mortor do të zhvillohet pjesërisht në këmbë, për t’u dhënë mundësi të gjithëve të shprehin respektin e fundit ndaj Papës. Gjatë tre ditëve të mëparshme, mbi 250.000 persona kanë kaluar nëpër Bazilikën e Shën Pjetrit për të bërë homazhe pranë trupit të tij, përpara se arkivoli të mbyllej të premten në mbrëmje.
