Presidenti amerikan Donald Trump ka zbutur tonin ndaj Kinës dhe kryetarit të Rezervës Federale, Jerome Powell, pas javësh tensionesh që kanë tronditur tregjet financiare ndërkombëtare.
Në një deklaratë nga Zyra Ovale, Trump tha se nuk ka ndërmend të shkarkojë kreun e bankës qendrore amerikane, pavarësisht kritikave të përsëritura ndaj politikës së tij monetare.
“Nuk kemi planifikuar asgjë të tillë. Media raporton si të dojë, por unë nuk kam ndërmend ta shkarkoj,” tha Trump. “Do të doja të ishte më aktiv në uljen e normave të interesit, pasi kjo është një kohë shumë e mirë për një lëvizje të tillë. Por, edhe nëse nuk e bën, nuk është fundi i botës.”
Krahas kësaj, presidenti amerikan u shpreh optimist për përmirësimin e marrëdhënieve tregtare me Kinën. Ai bëri të ditur se tarifat ndaj mallrave kineze “do të bien ndjeshëm, por jo në zero”, ndërsa theksoi se qëllimi i tyre është rikthimi i fabrikave dhe vendeve të punës në SHBA — një nga premtimet kyçe të axhendës së tij ekonomike.
Aktualisht, disa nga tarifat ndaj produkteve kineze kanë arritur deri në 145%, duke nxitur kundërpërgjigje nga Pekini dhe shqetësime të forta mes ekonomistëve për ndikimin global të një lufte tregtare.
Komentet e Trump vijnë mes spekulimeve për një tentativë të mundshme për shkarkimin e Powell, një veprim që nuk ka ndodhur kurrë në historinë e presidencës amerikane dhe për të cilin ekzistojnë dyshime ligjore.
Ndërkohë, Sekretari i Thesarit, Scott Bessent, tha se pritet një ulje e tensioneve me Kinën, duke e cilësuar situatën aktuale si “të paqëndrueshme dhe jo një shaka”.
Zbutja e qëndrimit të Trump ka sjellë frymëmarrje në tregjet globale. Indekset në Japoni dhe Hong Kong shënuan rritje të ndjeshme, ndërsa në SHBA, S&P 500 u rrit me 2.5% dhe Nasdaq me 2.7%.
