Kryeministri Edi Rama ka vijuar me ironitë ndaj opozitës gjatë Asamblesë Socialiste, ku ka komentuar edhe zgjedhjet e 11 majit.
Duke folur për procesin e liberalizimit të vizave me vendet e BE-së, Rama theksoi se shqiptarët nuk do të kenë më radhë për kontroll pasaportash dhe do të trajtohen njësoj si qytetarët e vendeve europiane. Ai ironizoi mbështetësit e opozitës, duke përmendur edhe Kujtim Gjuzin:
“Si mund të lihet kjo me tifozllëk, jam me këtë apo me Kujtim Gjuzin. Kujtimi është më simpatiku, por përveç mustaqeve s’ka asgjë tjetër. Ata të tjerët s’kanë as mustaqe,” – u shpreh Rama.
Kryeministri komentoi edhe ecurinë e Partisë Socialiste në Kavajë, duke kujtuar ndryshimet që, sipas tij, kanë ndodhur në këtë qytet nën qeverisjen e PS-së:
“Në Kavajë bëmë një rezultat të jashtëzakonshëm, e ndryshuam qytetin sepse më parë nuk kishte asgjë përveç pluhurit dhe farave të kungullit. Kur erdha për herë të parë, nuk bënim dot takim sepse nuk na linin në kinema. Pensionistët nuk i linin të votonin”, tha ai.
Në vijim, Rama u ndal te zgjedhjet e 11 majit, duke bërë thirrje për angazhim maksimal dhe duke përdorur sërish shprehjen “Noc Rroku”. Ai u shpreh se PS duhet të japë një përgjigje të fortë për opozitën në këtë proces:
“Në 11 Maj, ne do t’u prezantojmë atyre një Noc Rroku madhështor. Duhet të më ndihmoni ta realizojmë këtë, që ata të thonë ‘Çfarë i bëmë vetes që zgjuam Noc Rrokun’”, theksoi Rama.
