Qeveria ka shpallur një tjetër personazh publik si investitor strategjik, dhe kësaj radhe është moderatori Turjan Hysko. Në vendimin më të fundit të Komitetit të Investimeve Strategjike, i cili drejtohet nga kryeministri Edi Rama, është miratuar me statusin “Investitor Strategjik, Procedurë e Veçantë” projekti i investimit "Atara Resort & Villas".
Qeveria ka falur 77 mijë metra katrorë tokë shtetërore për këtë projekt, i cili parashikon ndërtimin e hoteleve dhe një fshati të madh turistik në bregdetin e Lukovës, në bashkinë Himarë. Kompanitë që do ta realizojnë projektin janë "Lukova Bayside Hotel & SPA shpk", "TO 27 Construction", si dhe "Emante sh.p.k.".
Këto kompani janë në pronësi të Turjan Hyskos dhe ish-kryetarit socialist të bashkisë së Vorës, Hekuran Brahimaj. Konkretisht, "Lukova Bayside Hotel & SPA shpk" ka si pronar Hekuran Brahimaj, i cili mban 65% të aksioneve, ndërsa Turjan Hysko ka 35%. Kompania tjetër, "TO 27 Construction", është 100% në pronësi të Turjan Hyskos, ndërsa "Emante sh.p.k.", e cila ka marrë përsipër garantimin e financimit, është 100% në pronësi të Hekuran Brahimajt.
Vlera totale e projektit pritet të arrijë në 50 milionë euro. Ajo që bie në sy është fakti se dy prej kompanive zhvilluese të projektit nuk kanë histori të aktiviteteve ekonomike ose mjete financiare të konsiderueshme. Kompania "Lukova Bayside Hotel & SPA shpk" ka deklaruar një kapital total prej vetëm 355 mijë eurosh, ndërsa "TO 27 Construction", e cila është themeluar vetëm një vit më parë, ka një kapital prej vetëm 870 eurosh. Si garante e këtij investimi është kompania "Emante", e cila në pasqyrën financiare për vitin 2023 ka raportuar një fitim prej 9 milionë eurosh.
Lidhjet e pronarëve me Partinë Socialiste dhe personazhet mediatik që shpallen investitorë strategjikë
Përveç shifrave, investitorët e sapo shpallur strategjikë janë individë me lidhje të drejtpërdrejta me Partinë Socialiste. Hekuran Brahimaj ka qenë ish-kryetar bashkie në Vorë, ndërsa Turjan Hysko është vëllai i ish-deputetit të PS-së, Elio Hysko, i cili ka shërbyer gjithashtu si kryetar i Forumit Rinor të kësaj force politike.
Turjan Hysko është një shembull tjetër se si një personazh mediatik shpallet investitor strategjik nga qeveria. Më herët, në vitin 2019, mediat raportuan se aktori i humorit Gazment Paja u shpall me të njëjtin status për ndërtimin e një kompleksi turistik në Dhërmi.
