Sali Berisha shprehu pakënaqësinë e tij ndaj zërave se Erion Veliaj mund të shpallet shumë shpejt nën hetim nga SPAK. Gjatë konferencës së sotme për shtyp, kryetari i PD deklaroi se, nëse SPAK ndërmerr veprime kundër kryebashkiakut të Tiranës, kjo do të ndodhë vetëm me urdhër të Edi Ramës dhe jo në emër të ligjit.
“Erion Veliaj, Engjëll Agaçi dhe Edi Rama duhej të ishin në qeli prej të paktën dy vitesh. Janë dhënë 130 milionë euro dhe nuk ekziston asgjë konkrete – gjithçka ka përfunduar në kontot e tyre bankare,” – u shpreh Berisha.
Me këtë qëndrim ai paralajmëroi se, nëse Veliaj dorëzohet drejtësisë, qëndrimi i tij ndaj kryebashkiakut mund të jetë i ngjashëm me atë që PD dhe vetë Berisha kanë mbajtur prej kohësh ndaj Arben Ahmetajt. Ish-zëvendëskryeministri, aktualisht në arrati pas një padie të ngritur nga SPAK, është mbrojtur nga një pjesë e opozitës, e cila e konsideron të keqpërdorur nga Rama, por jo përgjegjës për aferën e inceneratorëve.
