Ministrja e Turizmit dhe Mjedisit, Mirela Kumbaro, raportoi sot në Komisionin për Veprimtaritë Prodhuese, Tregtinë dhe Mjedisin në lidhje me kthimin e 102 kontejnerëve me mbetje nga kompania Kurum, të rikthyera në Shqipëri nga anija “Moliva”. Gjatë fjalës së saj, Kumbaro theksoi se dokumentacioni i çështjes është dorëzuar në prokurori dhe mohoi që bëhet fjalë për mbetje toksike, duke i quajtur ato “mbetje të rrezikshme”.
“Nuk ka folur njeri për mbetje toksike, dhe nuk është në asnjë nga letrat apo dokumentacionin që ka qarkulluar. Çështja po hetohet nga Prokuroria, e cila ka të gjithë dokumentacionin. Është identifikuar vendi ku do të vendosen kontejnerët me mbetjet e dyshuara të rrezikshme, të deklaruara nga subjektet si mall, nën-produkte metali. Prokuroria do të hetojë, dhe ne do të presim rezultatet e hetimeve.” tha Kumbaro
Deputeti i opozitës, Luan Baçi, reagoi ndaj deklaratave të ministres, duke kërkuar sqarime më të detajuara dhe duke theksuar se mbetjet janë të dyshimta.
“Po e thua me një fjalë tjetër, jo toksike, por të dyshuara të rrezikshme. Këtu mbyllet logjika.”
Kumbaro reagoi ndaj akuzave, duke i cilësuar ato si përpjekje politike të opozitës.
“E kuptoj hallin e opozitës, që nuk dini me çfarë të bëni politikë, se ju ka mbetur në majë të ballkonit. Referojuni ligjit për mbetjet e rrezikshme. Është mjerane të kapemi njëri-tjetrin, dhe është e pavërtetë që unë i jam shmangur mediave.”
Në këtë seancë u shpreh edhe Drejtori i Ministrisë së Turizmit dhe Mjedisit, Athanas Karaja, i cili sqaroi se kontejnerët janë regjistruar si mallra dhe se analizat laboratorike do të përcaktojnë natyrën e tyre.
Athanas Karaja, Drejtor në MTM:
“Deri sot që flasim, ka dyshime që janë mbetje, por nga ne nuk është dhënë leje për mbetje. Ato kanë kaluar si mallra. Analizat do shkojnë në Belgjikë, Zvicër dhe në tre laboratorë të tjerë për të vërtetuar nëse bëhet fjalë për mbetje.”
Opozita vazhdoi të ngulmojë se kontejnerët përmbajnë mbetje, ndërsa Kumbaro e cilësoi debatin si shpifje.
Mirela Kumbaro, Ministre e Turizmit dhe Mjedisit:
“Kjo është shpifje, sepse është mall.”
Drejtori Karaja shtoi se mallrat nuk u pranuan nga Tajlanda për shkak të rrëmujës në dokumentacion.
“Nuk u pranua nga Tajlanda për shkak të rrëmujës. Kur të vijë përgjigja, do marrim një shpjegim të saktë.” tha Athanas Karaja
Kumbaro e mbylli seancën me një apel për qetësi dhe për shmangien e politizimit të çështjes.
“Qetësohuni, nuk duhet të nxjerrim dhjamë nga pleshti politik.”
