Pas reagimeve që nxiti një shkrim i publikuar në fund të muajit të kaluar nga transmetuesi publik i Kosovës, ku pretendohej se dy gazeta në internet me seli në Prishtinë, janë financuar nga Serbia, kryetari i Bordit të Radiotelevizionit të Kosovës, Besnik Boletini, dhe anëtarja e këtij bordi, Arta Berisha, dhanë dorëheqje.
Shkrimi që ishte marrë nga portali boshnjak “Slobodna Bosna”, me 22 korrik, thuhet mes tjerash se “një portal në Kosovë është nën kontrollin e drejtpërdrejtë të terroristit nga Banjska, Milan Radoiçiç, ndërsa një portal tjetër ka pranuar transaksion milionësh, me qëllim të publikimit të shkrimeve kritike për qeverinë e Albin Kurtit”. Portali përmend gazetat në internet, Periskopi dhe Nacionale.
Kjo solli reagime të shoqatave të gazetarëve, medieve dhe organizatave joqeveritare të cilat i bënë thirrje Bordit të RTK-së të trajtojë situatën.
Bordi shpalli formimin e një komisioni për të hetuar përgjegjësinë editoriale, ndërsa ndërkohë me 26 korrik, ushtruesja e detyrës së drejtores së RTK-së, Zana Spahiu dha dorëheqje.
Kryetari i Bordit të RTK-së, Besnik Bislimi, shkroi të shtunën në rrjetet sociale se “Gjetjet e raportit të komisionit ishin të qarta. Që nga data 9 gusht, zëvendësdrejtori Adi Krasta (që i ka përgjegjësitë e drejtorit) nuk po e adreson këtë raport. Të jesh në krye të transmetuesit publik edhe për një ditë është privilegj, por edhe përgjegjësi. E siç po shihet ai nuk ka vullnet për të marrë masa ndaj atyre që e shkaktuan skandalin”.
Zoti Boletini tha se kishte kërkuar masa të rrepta rreth situatës së krijuar, por gjithçka u zvarrit.
“Unë nuk mund t’i mbyllë sytë para një lëshimi të madh profesional në asnjë mënyrë në asnjë rrethanë pa u ndëshkuar përgjegjësit. Tendenca për ta kaluar këtë rast vetëm me një kërkim falje është e pakapërdishme”, shkroi ai.
Pak orë më pas dha dorëheqje edhe anëtarja e Bordit të RTK-së, Arta Berisha, duke theksuar se është e papranueshme “që shkelësit e standardeve profesionale të kalojnë pa u ndëshkuar” sipas rregulloreve të RTK-së.
“Raporti i Komisionit të RTK-së është i qartë dhe tregon se në rastin e fundit - botimin e një teksti të paverifikuar dhe të plasuar fillimisht nga një medium tjetër - janë shkelur standardet profesionale të gazetarisë, për më keq: bordi është gënjyer. Kjo për mua është e patolerueshme. Shpresoj se praktika e mosndëshkimit të mos rikthehet në RTK”, shkroi zonja Berisha.
