"I kemi mirëpritur raportet preliminare për vlerësimin e qëndrueshmërisë së urës të cilat i po kemi ndarë dje edhe me komandantin e KFOR dhe ekipin e tij, në frymën e konsultimit dhe koordinimit të vazhdueshëm që kemi. Qeveria e Kosovës dhe unë, besojmë që liria e lëvizjes dhe sundimi i ligjit nga njëra anë dhe paqja e siguria në anën tjetër janë të mundura dhe të duhura për vendin shtetin, qytetarët, për shoqërinë e komunitetin. Hapja e urës nuk është kundër askujt aq më tepër ndaj partnerëve tanë. Kosova është shtet normal dhe urat e saj duhet të jenë normale, që do të thotë të hapura”, u shpreh Albin Kurti, kryeministër i Kosovës.
Më herët ambasadori i SHBA në Prishtinë, Jeffri Hovenier tha se hapja e urës do të rrezikonte sigurinë e ushtarëve të NATO-s. Shefi i ekzekutivit kosovar theksoi se qeveria e tij do të vazhdonte konsultimet dhe koordinimet me partnerët e Kosovës në lidhje me rihapjen e urës mbi lumin Ibër në veri.
Rihapja e urës për qarkullim edhe të automjeteve, është kundërshtuar nga bashkësia ndërkombëtare dhe nga serbët lokalë.
