Policia e Kosovës ka përfunduar aksionin e radhës në veri të vendit, ku u kontrolluan disa objekte të Postës së Serbisë.
Zëvendësdrejtori i policisë për rajonin e veriut, Veton Elshani, u shpreh se si rezultat janë mbyllur nëntë pika të kësaj poste.
“Pas konsultimit me prokurorin nëntë nga to janë mbyllur. Zhvillimi biznesor ekonomik duhet të jetë i regjistruar, dhe të ketë licencë, fjala është për posta të cilat kanë funksionuar në mënyrë ilegale deri më tani. Nuk kemi pasur persona të arrestuar, në fakt në Leshak gjatë mbylljes së një lokali, dy persona të dehur kanë ardhur afër policisë, janë shoqëruar në stacion të policies” – u shpreh Elshani.
Ky peracion sipas tij erdhi pas kërkesës që u ka bërë Autoriteti Rregullativ i Komunikimeve Elektronike dhe Postare, ku aty u njoftuan për zhvillimin e disa aktiviteteve ekonomike të disa bizneseve të palicensuara dhe të paregjistruara në veriun e vendit.
“Në fakt këto ka qenë në të gjithë Kosovën por në veri të vendit ne jemi autoritet, dhe kemi vepruar”, theksoi Elshani.
