Kryetarja e Kuvendit të Kosovës, Albulena Haxhiu, ka reaguar për protestat që po zhvillohen në Shqipëri, duke u bërë thirrje institucioneve shqiptare të marrin seriozisht kërkesat e studentëve dhe të shmangin qëndrimet arrogante që, sipas saj, nxisin përshkallëzimin e protestave.
Në një deklaratë pas mbledhjes së Kryesisë së Kuvendit, Haxhiu u shpreh se zhvillimet në Shqipëri po ndiqen me shqetësim edhe në Kosovë, duke theksuar lidhjet e ngushta mes dy vendeve.
“Secili në Kosovë i ka përcjellë zhvillimet në Shqipëri. Ajo çfarë po ndodh atje sigurisht që na shqetëson të gjithëve, sepse Shqipëria për ne është shtëpi”, deklaroi Haxhiu.
Kryeparlamentarja e Kosovës theksoi se Kuvendi, Qeveria dhe Presidenca e Shqipërisë kanë përgjegjësinë të shqyrtojnë kërkesat e studentëve, ndërsa dënoi përdorimin e dhunës nga të dyja palët.
“Kuvendi, Qeveria dhe Presidenca e kanë për obligim që t’i trajtojnë kërkesat e studentëve. Natyrisht që ne nuk e mbështesim dhunën, ajo duhet të ndalohet nga të dyja palët”, u shpreh ajo.
Haxhiu paralajmëroi se mungesa e dialogut dhe qëndrimet arrogante ndaj protestuesve mund të thellojnë më tej pakënaqësinë.
“Është e rëndësishme qasja serioze në raport me këto protesta, jo arroganca. Mendoj që arroganca vetëm i nxit protestat”, përfundoi kryetarja e Kuvendit të Kosovës.
