Giorgia Meloni është shpallur “personi më i fuqishëm në Europë” sipas renditjes për vitin 2025 nga edicioni europian i revistës amerikane Politico. Artikulli nis me pyetjen: “Kë telefononi nëse doni të flisni me Evropën?” Duke iu referuar Elon Musk, miliarderit më të pasur në botë dhe këshilltarit të presidentit të zgjedhur të SHBA-së, Donald Trump, përgjigjja është e qartë: Giorgia Meloni.
Në më pak se një dekadë, liderja e partisë së djathtë “Vëllezërit e Italisë” ka kaluar nga të qenit ultranacionaliste në kryeministre të Italisë, duke u bërë një figurë kyçe si për Brukselin ashtu edhe për Uashingtonin. Revista Politico, e cila e cilësoi atë si “liderja më konkrete e BE-së” në nëntor 2023, kthehet për të vlerësuar ndikimin e saj të jashtëzakonshëm.
Meloni ka tërhequr vëmendjen botërore si kryeministrja e parë grua e Italisë, një arritje që pak vetë do ta kishin imagjinuar të shoqërohej me një qëndrueshmëri kaq të gjatë në pushtet. Fillimisht, shumë analistë parashikonin se përçarjet brenda koalicionit të saj qeverisës do të çonin në dështimin e qeverisë. Gjithashtu, mungesa e mbështetjes entuziaste nga Brukseli ishte një tjetër pengesë.
Por në dy vitet e fundit, Meloni ka arritur të konsolidojë një nga qeveritë më të qëndrueshme në historinë e kohëve të fundit të Italisë. Pavarësisht borxhit publik të lartë, që përfaqëson 137% të PBB-së, perspektivat ekonomike nuk kanë qenë aq të errëta sa të trembin investitorët e huaj. Përkundrazi, Italia nën drejtimin e saj ka krijuar një klimë politike të jashtëzakonisht të qetë, duke tërhequr interes ndërkombëtar.
