Deputeti i Partisë Socialiste, Plarent Ndreca, është paraqitur sot në GJKKO për seancën paraprake, pasi është marrë i pandehur nga SPAK për shkelje të barazisë në tendera. Ai akuzohet se, në bashkëpunim me zyrtarë të tjerë të Ministrisë së Brendshme, ka favorizuar biznesmenin Gjon Radovani për të fituar tenderin e rikonstruksionit të katër komisariateve të policisë.
Sipas hetimeve të SPAK, Ndreca ka pasur komunikime të drejtpërdrejta me Radovanin, duke qenë në dijeni të përfshirjes së tij në hartimin e projekteve për objektet e policisë. Po ashtu, zyrtarë të tjerë të ministrisë dhe institucioneve të tjera shtetërore dyshohet se kanë ndihmuar në sigurimin e fitores së bashkimit të operatorëve ekonomikë Derbi-E shpk dhe APE shpk, edhe pse këta nuk përmbushnin kriteret ligjore.
Ky tender, me vlerë fillestare mbi 54 milionë lekë (pa TVSH), përfundoi me një kontratë të reduktuar në 34.2 milionë lekë, pasi Ministria e Brendshme nuk kishte fondet e plota. Ndreca, i cili mori mandatin e deputetit në janar pas largimit të Arben Ahmetajt, është aktualisht nënkryetar i Komisionit Hetimor për koncesionet në Shëndetësi.
